من هو .. Yevadu
*************
افلام 2014 فيها قاسم مشترك .. وهى ان الفيلم ناس تحبه اوى وناس تكرهه اوى .. ناس تشوفه ناجح اوى .. وناس تشوفه فاشل اوى .. وكالعاده مع فيلم مثير للجدل رجعتلكم والمره دى تيلجو ..
القصه :
شاب بيتم قتله وحبيبته .. وبيتم نقل وجه شخص اخر له ليسعى فى الانتقام .. ولكن القصه لا تقف هنا .. !!
بطولة:
رام شاران : ساتيا - رام - شاران
شروتى حسن : مانجو
الو ارجون : ساتيا
كاجول اجروال : ديبثي
الاداء :
رام شاران : معرفش العيب فى ملامحه اصلا ولا منه هو .. مش بشوف فيه غير ملامح الغضب والانتقام .. انما الرومانسيه والكوميديه مش بيبدع فيهم اوى .. وشه مش بيجيب اكتر من الغضب .. دوره كان ثابت الشاب الغاضب الساعى فى الانتقام ..
شروتى حسن : طلعت فى مشهدين دورها كان حبيبة شاران .. بس مكنش دورها مؤثر اوى ..
الو ارجون : ايوه بقى هو دة الكلام .. رغم انى اول مره اشوفه لانى مش متابعة جنوبى اصلا .. بس لمسنى دوره اوى .. مطلعش غير عشر دقايق .. بس شفت فى عينيه غضب وحب وحزن والم .. بفكر اتفرج على افلامه .. دوره كان ممتاز وكان اضافه قويه للفيلم
كاجول اجروال : هى دى اللى اشعلت فتيل الفيلم بسبب قتلها .. مش هقول اكتر من اللى قولته عن الو ارجون منتهى الجمال والبرائه والرقه ..
بأختصار الو ارجون وكاجل هما فاكهه الفيلم
تحليل:
- الفيلم عباره عن قصتين قصة ساتيا وقصة شاران .. الاتنين اتعرضوا لحادثتين قتل فى نفس المكان والزمان .. ولكن ملهمش علاقه ببعض والاقدار اللى بتجمعهم مذهله .. قصه مهروسه .. بس عجبتنى جداً
- بداية الفيلم .. عقدة الفيلم .. نهاية الفيلم .. حلوين منحنى من متوسط لعالى لمنخفض ..
- الفيلم قصة انتقام لمحبين الاكشن بس شرط انك تبيع دماغك شويه .. لان فى رفارف وناس بتطير ..
- الفيلم اتكلف 500 مليون وارباحه كانت 481 مليون .. للأسف مجبش مصاريفه ..
- من اخراج Vamsi paidipally ودة مخرج افلام توليوودى .. وحقيقى معرفش عنه اكتر من كدة ..
- الموسيقى كانت لـ Devi Sri Prasad ودة موسيقى ومغنى كبير فى افلام التيلجو والتاميلى ..
- الفيلم فى حماس حلو اوى .. وفى نقطه هتخليك مستغرب ان قصة الانتقام هتخلص قبل نص الفيلم فانت هتبقى مستغرب ... امال هيحصل ايه بعد كدة طيب .. لحد ما تتصادم بقى فى ان للقصه بقية .. صاحب الجسد خلص انتقامه ولكن صاحب الوجه لم ينتقم بعد ...
- الفيلم نصه اتصور فى دلهى والنص التانى فى جنوب الهند ..
سلبيات :
- بزمتك يا مؤمن الو ارجون ورام شارن نفس الطول .. بمجرد ما نقلوا وش شاران لساتيا بقو نفس الطول والعرض .. ايه العمليه اللى بتظبط معاها الوزن والطول دى
- بيفكوا الشاش عن وشه وشعره معمول سيشوار ومفيش اثر لغرزه واحده .. ناهيك عن انه كله اتحرق ومطعون بسكينه ولسه عايش .. حقيقى اوفر
- بالنسبه لان العصابه معهاش سلاح .. على طول بيجروا بس .. اوبشن العربيات والرشاشات والحاجات الجامده دى فين ... !!
الفيلم حلو بالنسبالى جداً واستمتعت بيه اوى .. بس للناس اللى تحب تقعد تفصص الفيلم وتنط فى كل مشهد مش هيعجبها ..
الفيلم مشاهدة مره واحده فقط
صالح للمشاهده العائليه
تقييمى
2.8/5
تقييم موقع الـ IMDb
4.4/10
