كلمات الأغنية
- حبيبتي شٌفتي اللي حصل في سوريا ؟!
= هذاكر للولاد حاضر وأعيشهم وهادعيلهم
وأحميهم كمان بدري وأنيمهم وأغنيلهم
هاسيب المكواة دي لبكرا عشان تعبانة مش قادرة
ده شغل البيت يهد الحيل
وهاتلنا عيش وكيس سكر وجبنة يا ريت ولو تقدر ماتسهرش لنص الليل
- حبيبتي عيش وسكر إيه وليه مش شايفة غير نفسك
بلد بتموت عشان الكل قال نفسي
= حبيبي العيد خلاص قرب فـ شيللي كام جنيه على جنب
بلاش كالعادة تتهرب وتيجي تقوللي وضعك صعب
- ومين جاب بس سيرة العيد وليه مش حاسة بالموضوع
بلد بتموت عشان الكل .. عشان الكل مش حاسس
= حبيبي أنا عاملة مش سامعاك عشان خايفة لا يوم أتهد
مانا من كتر أوجاعي بخاف أوصف مشاعري لحد
بخاف على بكرا من بكرا .. وأخاف دايمًا أنا من الجاي
وقلبي مات على فكرة لكنه مُصِّر يظهر حي
في ناس الغربة كسراها وناس الغربة كارهاها
وناس مضطرة فـ بتبعد وشايلة بلدها جواها
وهو يا سوريا ده الموضوع ..
وطن بيموت عشان الكل مش سامع، مش فاهم، مش حاسس، قال نفسي ..
فهمت حبيبي ؟!
- فهمت خلاص .. هاجيب العيش وأنا جاي والسكر ومش هتأخر
