طريقة عمل الفطير المشلتت فى البيت لرأس السنة الهجرية
بما اننا فى مناسبه حلوه وهى رأس السنه الهجريه كل سنه وانتوا بالف خير وبما اننا كتير مننا متعودين يعملوا فطير هقولكم طريقتى فى عمل الفطير المشلتت بصى يا ستى انا بعمله ازى
1- نص كيلو دقيق بس دقيق للحلويات نوع كويس
2- ميه للعجن
3- رشة ملح
4- رشة سكر
وتعجنيه كويس لحد ما تكون العجينه زى الملبن فى ايدك مش معنى كده انها تلزق يعنى تكون حلوه وكمان تفضلى تليتى فيها كويس حوالى ربع ساعه وبعد كده تقسميها لحوالى من 8 الى 10 حتت على حسب الحجم اللى عاوزه وبعد كده تحطى عليها زيت وتسبيها حوالى نص ساعه ترتاح وبعد كده تبدائى تفرديها على الرخامه بالزيت بس بايدك مش بالنشابه تفردي كويس لحد ما تلقيها رقيقه معاكى وبعد كده تدهنيها سمنه تكونى مسايحها وتطبقيها وبعدين تحطيها على جنب وبعد كده تاخدى التانيه تعمليها نفس الطريقه بس قبل ما تطبقيها حطى اللى عاملتيها جواها وطبقى العجينه عليها ونفس الطريقة فى الثالثه ثلاث طبقات بس لازم تدهنى كل واحده بالسمنه وتسبيها فى صنيه وداخليها الثلاجه لمده نص ساعه وبعدين طلعيها وافرديها بايدك وبعدين حطيها فى الثلاجه تانى نص ساعه وطلعيها وممكن الفريزر 10 دقائق اسهل وبعد كده تقطعى زبده جامده مش سايحه وحطيها على الوش او قشطه تحطيها على وش الفطير والفرن يكون حامى اووووى وداخليها فيه اول ربع ساعه وبعدين وطى عليه وهتطلع تحفه لو ما اتحمرتش من فوق ممكن تفتحى عليها الشوايه وحمرى وشها بس هى مع الفرن الحامى هتتحمر وبالف هنا .
